لا السجن سجن ولا الكفن

لا السجن سجن و لا الكفن
من قصائد فؤاد حداد

ياللى أنت حكم الداء سميرك
يا مجاهد و مريح ضميرك
خبرنى عن حق البدن
فى سجن مصر و قل لى ليه
مصر و كيانها مضاف اليه
سجانه و لا بتنسجن
مسجون و ليه؟لاجل الفقير
لاجل اللى بايت ع الحصير
لاجل الشرف لاجل الوطن
لاجل العدالة بيظلموك
و الحق لاجله بيحرموك
حقك و لاجله بتمتهن
جاب الطبيب سماعته يسمع
ماقدرش بين اضدادها يجمع
سمع الاوامر أولاً
خلى الليالى السود تمر
و تزيد فى كاس الحر مر
لعيالك تمن لشفاك تمن
مالك حزين ياقلبى مالك
اصبر على الظلم و تمالك
لو كنت يا ابنى يا حسن
من ضهر ةاغنيا او اجانب
تاكل الحياة شهد و لبن
لكن حياة السجن اجمل
للى حمل جرحه و تحمل
جرحه فى سره و العبن
أعرف صديق انسان تصور
كان فى الزبالة جعان يدور
على لقمة أخطأها العفن
يا نفسى أفضل لك تجوعى
و أفضل على الايام مجاهد
لا السجن سجن و لا الكفن
احنا آمنا بشعبنا
و أنتو كفرتو بربنا
و القرش و النسوان وثن
احنا الدموع احنا العرق
احنا الكتابة على الورق
احنا اللى بنمشى الزمن
ذكر المرض و ذكر صلاح
على أرض قلبه الفجر لاح
و الأمن فى إيمانه سكن