رباعيات صلاح جاهين

شاف الطبيب جرحي وصف له الأمل / وعطاني منه مقام يا دوب ما اندمل / مجروح جديد يا طبيب و جرحي لهيب / ودواك فرغ مني .... و إيه العمل

أعرف عيون هي الجمال و الحسن / و اعرف عيون تاخد القلوب بالحضن / و عيون مخيفة و قاسية وعيون كتير / وباحس فيهم كلهم بالحزن

[size=24]
إيش تطلبي يا نفس فوق كل ده / حظك بيضحك و انتي متنكده / ردت قالت لي النفس : قول للبشر / ما يبصوليش بعيون حزينة كدة[/b][/size]

إقلع غماك يا تور وارفض تلف / إكسر تروس الساقية و اشتم وتف / قال : بس خطوة كمان .. وخطوة كمان / يا اوصل نهاية السكة يا البير تجف

في يوم صحيت شاعر براحة و صفا / الهم زال والحزن راح و اختفي / خدني العجب و سألت روحي سؤال / أنا مت ؟ و لا وصلت للفلسفة [/b]

الفيلسوف قاعد يفكر سيبوه / لا تعملوه سلطان و لا تصلبوه / ما تعرفوش إن الفلاسفه يا هوه / اللي يقولوه بيرجعوا يكدبو

[b] رقبه قزازة و قلبي فيها انحشر / شربت كاس و اتنين و خامس عشر / صاحبت ناس م الخمرة ترجع وحوش / و صاحبت ناس م الخمرة ترجع بشر [/b]

نوح راح لحاله و الطوفان استمر / مركبنا تايهه لسه مش لاقيه بر / آه م الطوفان وآهين يا بر الأمان / إزاي تبان و الدنيا غرقانة شر

[b]علي رجلي دم .. نظرت له ما احتملت / علي إيدي دم.. سألت ليه ؟ لم وصلت / علي كتفي دم.. و حتي علي رأسي دم / أنا كلي دم .. قتلت ؟ ..... والا اتقتلت

ورا كل شباك ألف عين مفتوحين / و انا وانتي ماشيين يا غرامي الحزين / لو التصقنا نموت بضربة حجر / و لو افترقنا نموت متحسرين [/size]

انا كل يوم أسمع ........ فلان عذبوه / أسرح في بغداد و الجزاير واتوه / ما أعجبش م اللي يطيق بجسمه العذاب / و اعجب من اللي يطيق يعذب أخوه

يا قرص شمس ما لهش قبة سما / يا ورد من غير أرض شب و نما / يا أي معني جميل سمعنا عليه / الخلق ليه عايشين حياه مؤلمة

و الكون ده كيف موجود من غير حدود / و فيه عقارب ليه و تعابين ودود / عالم مجرب فات و قال سلامات / ده ياما فيه سؤالات من غير ردود
[size=24]
أنا شاب لكن عمري ألف عام / وحيد لكن بين ضلوعي زحام / خايف و لكن خوفي مني أنا / أخرس و لكن قلبي مليان كلام

يا باب يا مقفول ... إمتي الدخول / صبرت ياما و اللي يصبر ينول / دقيت سنين ... و الرد يرجع لي : مين ؟ / لو كنت عارف مين أنا كنت أقول

[b] أحب أعيش ولو في الغابات / أصحي كما ولدتني أمي و ابات / طائر .. حوان.. حشرة .. بشر ..بس أعيش / محلا الحياة.. حتي في هيئة نبات

[size=24]سهير ليالي و ياما لفيت و طفت / و ف ليه راجع في الضلام قمت شفت / الخوف ... كأنه كلب سد الطريق / و كنت عاوز أقتله .. بس خفت [/size]

[b]
عجبتني كلمة من كلام الورق / النور شرق من بين حروفها و برق / حبيت أشيلها ف قلبي .. قالت حرام / ده أنا كل قلب دخلت فيه اتحرق [/b][/size]

[size=24]ياما صادفت صحاب و ما صاحبتهمش / و كاسات خمور و شراب و ما شربتهمش / أندم علي الفرص اللي انا سبتهم / و الا علي الفرص اللي ما سبتهمش

ضريح رخام فيه السعيد اندفن / و حفره فيها الشريد من غير كفن / مريت عليهم .. قلت يا للعجب / لاتنين ريحتهم لها نفس العفن
خرج ابن آدم من العدم قلت : ياه / رجع ابن آدم للعدم قلت : ياه / تراب بيحيا ... وحي بيصير تراب / الأصل هو الموت و الا الحياه ؟ !!!

ميرسي يا شيري

بس انتي جايبة دول و بس

عشان الظروف الوحشة اللي بنمر بيها

و لا كل رباعيات جهين حزينة

لو في رباعيات سعيدة

ياريت تجيبيلنا شوية

بصراحة دول اللى قدرت اجيبهم
و اوعدك طالما بتحب صلاح جاهين هجيبلك رباعياته
و اكتبها ع المنتدى
و ميرسى ع الرد يا حسن

ميرسى ياشيرى
وياريت فعلا تقدرى تجيبى كل اشعار جاهين

» رباعيات الخيام