الليالى كحل و القضبان مراود

الليالى كحل و القضبان مراود
من اشعار فؤاد حداد

ماتوا عشاق العيون العسلية
و العيون السود يا عشاق العيون
فى عيون زينب و فاطمة اسماعيلية
ساكنها قبور و أبوابها سجون
فى عيون زينب و فاطمة و عايشة ميتم
فى عيون ليلى ليالى اربعين
فى عيون إنصاف و فتحية و مريم
السهر و الحزن فى الليل الحزين
فى عيون إنصاف و فتحية و محاسن
مات ربيع الحب و ارتاحوا الطغاة
عصف النسيانبأزهار الجناين
عصف الطغيان بأزهار الحياة
فى عيون وردة دموع غير الندى
و دموع أضعف من قلوب الضعيف
و دموع نرجس مآسى مجردة
و دموع نرجس كأوراق الخريف
و دموع ياسمين بتلطم خدها
خدها الياسمينصبح لون الدموع
و دموع سوسن ثوانى تعدها
جسمها يدوب زى ماتدوب الشموع
شم لو تقدر تشم فى مصر زهرة
و انظر البدر شريدع الأفاريز
و اسمع الموت أعلى صوت فى مصر و أقرا
فى عيون مصرية ظلم الانجليز
ياللى شفت فى سجن مصر عيون حنان
تحت وطء الدمع و الحزن المعاود
ارتدت ثوب الحداد قبل الأوان
الليالى كحل و القضبان مراود
شوف فى مصر السجن مصر المعتقل
مصر قطاع كفر عبده و بهوت
فى عيون مصرية اطلال الامل
سؤال الناس نعيش والا نموت
و سؤال الناس نموت ولا نعيش
فى عيون أختك و أختى الملايين
فى عيون العاملات تشقى لمافيش
و حيبتى السمرا بنت الفلاحين
انا شفت الدمع فى عيون جمالات
السجون كلها و المستشفيات
الجراح المستبدة و العاهات
أنا شفت الدم فى عيون جمالات
ينابيع الحب بتسيل جراحي
انا بائس أنا مسكين أنا شاعر
أنا مطعون قلبى من كل النواحى
لما شفت الدمع فى عيون أختى ساهر
آه يابا من وجودى و آه يابا من عيونى
اللى بيعيشوا على دموع الغلابا
يابا و دموع الغلابا قتلونى
فبراير 1952
ارفعى جبينك يا أختى يبتسم له
شاعر الوادى و نيله و أخضره
الشهيد الحى بكرة ننتقم له
و السجين الحر بكره نحرره
اغسطس 1952

جمييييييييييييييييييييييييييييييييييييييييلة